IN LINGUA CORSA
Addunita di sustegnu à Joseph Colombani (Adecec)
Una cinquantina d’agricultori si sò adduniti sta mane davant’à u palazzu di Ghjustizia in Bastia, pè sustene à Joseph Colombani, presidente di a camera d’agricultura di Cismonte. Frà elli, Lionel Mortini, presidente di l’offiziu di u sviluppu agriculu è rurale di a Corsica (ODARC) è u presidente di l’assemblea di Corsica Jean-Guy-Talamoni. A prefettura di Cismonte accusa à Joseph Colombani d’avè sciappatu mubiglia è materiale di scagnu à a DDTM, Direzzione Dipartimentale di i Territorii è di u Mare. Duie lagnanze sò state dipusitate da u prefettu di Cismonte è u direttore di a DDTM. St’addunita di sustegnu si face dopu à parechji ghjorni di crisa agricula in l’isula. I sindicati dinunzianu i cuntrolli abusivi è a perdita di suvvenzione in u quadru di a pulitica agricula cumuna.
